بالی ووڈ کے مزاحیہ اداکار راجپال یادیو سے متعلق حال ہی میں سوشل میڈیا پر ایک ویڈیو تیزی سے وائرل ہوئی، جس کے بعد یہ قیاس آرائیاں شروع ہوگئی تھیں کہ سینئر اداکار مشتاق خان کی دعائیہ تقریب کے دوران انہیں بے عزت کرکے نکالا گیا ہے۔
وائرل مناظر میں دیکھا جا سکتا تھا کہ دعائیہ تقریب کے باہر بھیڑ میں راجپال یادیو موجود ہیں اور وہاں موجود کچھ لوگ یا سیکیورٹی اہلکار ان سے بات کر رہے ہیں، جس کے بعد وہ وہاں سے چلے گئے۔
سوشل میڈیا پر دعویٰ کیا گیا کہ انہیں تقریب سے جانے کو کہا گیا تھا۔
حقیقت میں راجپال یادیو کے ساتھ کسی قسم کی بےعزتی یا بدتمیزی نہیں ہوئی۔ وہ مرحوم اداکار مشتاق خان کو خراجِ عقیدت پیش کرنے پہنچے تھے اور دعائیہ تقریب میں شرکت کے بعد جب باہر نکل رہے تھے تو میڈیا اور بھیڑ کے باعث رش ہوگیا تھا، جس پر انہیں گاڑی تک جانے کا راستہ دیا جا رہا تھا۔
واقعے کی مسخ شدہ ویڈیو وائرل ہوتے ہی مداحوں نے غصے کا اظہار کیا، تاہم مکمل منظر سامنے آنے پر یہ واضح ہو گیا کہ یہ محض ایک سنسنی خیز اور غلط فہمی پر مبنی افواہ تھی۔
