امریکی صدر ڈونلڈ ٹرمپ کے وینزویلا کے تیل پر اختیار حاصل کرنے کے اعلان کے بعد عالمی سطح پر خام تیل کی قیمتوں میں نمایاں کمی دیکھی گئی ہے۔
غیر ملکی خبر رساں ایجنسی کے مطابق عالمی مارکیٹ میں خام تیل کی قیمتیں ایک فیصد سے زائد گر گئی ہیں، جس کے بعد تیل کی قیمت 60 ڈالر فی بیرل تک پہنچ گئی۔صدر ٹرمپ نے نیویارک کی عدالت میں وینزویلا کے صدر کے خلاف مقدمے اور گرفتاری کے بعد اعلان کیا کہ وینزویلا اب امریکہ کو 3 کروڑ سے 5 کروڑ بیرل خام تیل فراہم کرے گا اور امریکی آئل کمپنیاں وہاں سرمایہ کاری کریں گی۔ ان کے مطابق اس معاہدے کے تحت امریکی کمپنیاں وینزویلا کی تیل کی صنعت میں شامل ہو کر عالمی منڈی میں تیل کی فراہمی کو یقینی بنائیں گی۔ مزید برآں، تیل کی فروخت سے حاصل ہونے والی رقم امریکی صدر کے کنٹرول میں رہے گی تاکہ اسے دونوں ممالک کے عوام کے مفاد میں استعمال کیا جا سکے۔
صدر ٹرمپ نے کہا کہ یہ تیل براہِ راست امریکی بندرگاہوں تک منتقل کیا جائے گا، جس کے عالمی منڈی پر فوری اثرات مرتب ہوئے اور خام تیل کی قیمت میں 1.4 فیصد کمی ریکارڈ کی گئی۔
تجزیہ کاروں کا کہنا ہے کہ وینزویلا کے ذخیرہ شدہ تیل کی مالیت تقریباً 3 ارب ڈالر ہو سکتی ہے، اور اگر یہ تیل عالمی منڈی میں آ جائے تو قیمتوں میں مزید کمی کی توقع ہے۔
واضح رہے کہ وینزویلا کے پاس دنیا کے سب سے بڑے تیل کے ذخائر موجود ہیں، مگر بدانتظامی اور کرپشن کے باعث اس کی پیداوار گزشتہ 25 سال میں روزانہ 35 لاکھ بیرل سے کم ہو کر 10 لاکھ بیرل یومیہ رہ گئی ہے، جو عالمی پیداوار کا صرف ایک فیصد سے بھی کم ہے۔
توانائی کنسلٹنسی کمپنی رسٹاڈ انرجی کے مطابق وینزویلا کی تیل کی صنعت کو ماضی کی سطح پر واپس لانے کے لیے کم از کم 15 سال اور تقریباً 185 ارب ڈالر کی سرمایہ کاری درکار ہوگی۔
اس پیش رفت سے عالمی تیل مارکیٹ میں ہلچل مچ گئی ہے، اور سرمایہ کاروں کی نظریں آئندہ دنوں میں ہونے والے مزید اقدامات اور قیمتوں میں ممکنہ کمی پر مرکوز ہیں۔
