بین الاقوامی ایوارڈ یافتہ مقبول فلم’’امریکی نش‘‘ جس میں معروف پاکستانی امریکی فنکارہ آئزہ فاطمہ نے مرکزی کردار ادا کیا ہے، 18 اپریل کو پاکستان کے تمام شہروں میں سنیما گھروں کی زینت بنے گی۔
اس فلم کی ہدایت کاری ایمان زوہری نے کی ہے، جبکہ اسے پاکستان میں آئی ایم جی سی کے پلیٹ فارم سے ریلیز کیا جا رہا ہے۔ ’’امریکی نش‘‘ ایک رومانوی کامیڈی ہے، جو تین پاکستانی امریکی خواتین کی کہانی بیان کرتی ہے جو نیو یارک کے جیکسن ہائٹس میں پیار و محبت، شناخت، ثقافت اور کیریئر کے مسائل سے نبرد آزما ہیں۔
فلم امریکا میں جنوبی ایشیائی مسلم خواتین کی زندگیوں کے مسائل کو حقیقی انداز میں پیش کرتی ہے۔
’’امریکی نش‘‘ کو امریکا میں سونی انٹرنیشنل نے ریلیز کیا، جہاں اس نے بین الاقوامی سطح پر پذیرائی حاصل کی اور اب یہ پاکستان میں ڈسٹری بیوشن کلب کے تحت ریلیز ہو رہی ہے۔
یہ فلم اب تک 25 عالمی فلمی ایوارڈز جیت چکی ہے اور اسے نیو یارک ٹائمز، این پی آر، گارڈین اور بی بی سی وومن کے ذریعہ سراہا گیا ہے۔
فلم کی لیڈ فنکارہ آئزہ فاطمہ، جو کہ ایک معروف فلم ساز، اداکارہ اور سابقہ گوگل انجینئر ہیں، وہ فلم کی ریلیز اور تشہیر کےلیے 11 اپریل سے 22 اپریل تک پاکستان موجود میں ہوں گی۔
آئزہ فاطمہ کراچی میں 17 اپریل تک موجود رہیں گی اور اس دوران فلم کے حوالے سے خصوصی تقریبات اور میڈیا میں شرکت کریں گی۔